ភ្នំពេញ៖ ក្រសួងសង្គមកិច្ច អតីតយុទ្ធជន និងយុវនីតិសម្បទា បានចុះហត្ថលេខាផ្ដោះប្ដូរសារលិខិតជាមួយការិយាល័យប្រធានអង្គការសហប្រជាជាតិប្រចាំប្រទេសកម្ពុជាដើម្បីពង្រឹងភាពជាដៃគូរយុទ្ធសាស្ត្រ ពង្រឹងសមត្ថភាពដឹកនាំ និងកសាងការសហការអន្តរវិស័យក្នុងដំណាក់កាលស្ដារឡើងវិញក្រោយការរាតត្បាតនៃជំងឺកូវីដ-១៩។

ការចុះហត្ថលេខាផ្ដោះប្ដូរសារលិខិតនេះធ្វើឡើងរវាងរដ្ឋមន្ត្រីក្រសួងសង្គមកិចុ្ច លោក វង សូត និងប្រធានអង្គការសហប្រជាជាតិប្រចាំប្រទេសកម្ពុជា លោកស្រី Pauline Tamesis នៅទីស្ដីការក្រសួងសង្គមកិច្ចកាលពីព្រឹកថ្ងៃទី២៤ ខែវិច្ឆិកា ឆ្នាំ២០២១។

កម្មវិធីនេះនឹងដំណើរការរយៈពេល៦ខែ ក្នុងការពង្រឹងសមត្ថភាពដឹកនាំក្នុងការប្រមើលមើលពីអនាគតជាយុទ្ធសាស្ត្រ និងសមត្ថភាពគិតបែបប្រព័ន្ធរបស់អ្នកដឹកនាំមកពីតាមវិស័យនានា ព្រមជាមួយនឹងការកសាងឱកាសឱ្យមានការសហការអន្តរវិស័យ និងពិសោធន៍ការងារសម្រាប់អ្នកដឹកនាំមកពី រដ្ឋាភិបាល វិស័យឯកជន និងសង្គមស៊ីវិលក្នុងដំណាក់ស្ដារឡើងវិញក្រោយការរាតត្បាតជាសកលនៃជំងឺកូវីដ-១៩។

ក្នុងសេចក្ដីប្រកាសព័ត៌មានរួមគ្នារវាង UN និងក្រសួងសង្គមកិច្ចបានលើកឡើងថា៖ «កម្មវិធីកសាងថ្នាល់បច្ចេកវិទ្យាសម្រាប់ជួយសម្រួលដល់កិច្ចសហការអន្តរវិស័យ ដើម្បីការអភិវឌ្ឍដោយចីរភាព Cambodia Future Lab នឹងផ្ដល់ជាវេទិកាកំណត់ពីប្រភេទបរិវត្តកម្មប្រព័ន្ធ (System Transformation) ដែលអាចឱ្យគេយកនវានុវត្តន៍ និងការប្រមើលមើលពីអនាគតជាយុទ្ធសាស្ត្រ (Strategie Foresight) ទៅប្រើប្រាស់ក្នុងកិច្ចខិតខំប្រឹងប្រែងស្ដារឡើងវិញពីជំងឺកូវីដ-១៩ និងពន្លឿនរបៀបវារៈឆ្នាំ២០៣០។ វេទិការរួមនេះ ផ្ដល់លទ្ធភាពឱ្យមានការចូលរួមសហការជាមួយតួអង្គពាក់ព័ន្ធនៅក្នុងប្រទេស ដើម្បីសម្រួចអនាគតប្រកបដោយបរិយាបន្ន និងចីរភាពកម្ពុជា» ។

បើតាមសេចក្ដីប្រកាសក្រសួងស្ថាប័នពាក់ព័ន្ធនៃកម្មវិធី Cambodia Future Lab នេះរួមមានក្រសួងសង្គមកិច្ច អង្គការសហប្រជាជាតិ ក្រសួងមុខងារសាធារណៈ សាលាភូមិន្ទរដ្ឋបាល ក្រសួងសេដ្ឋកិច្ច សហគ្រាសខ្មែរ ក្រសួងពាណិជ្ជកម្ម ក្រុមប្រឹក្សាគាំពារសង្គម និងសហការជាមួយវិទ្យាស្ថាន Presencing Institute និងមូលនិធី United in Diversity Foundation៕

រូបភាពផ្ដល់ជូន៖